काठमाडौँ / नेपाल बैंक लिमिटेड र फिन्टारा सोलुसन्स प्रा.लि.बीच क्रेडिट कार्डबाट किस्ताबन्दीमा सामान खरिद गर्न सकिने सुविधा उपलब्ध गराउने सम्बन्धमा सम्झौता भएको छ ।
नेपालको पहिलो बैंक नेपाल बैंक लिमिटेडले बैंक स्थापनाको ९०औँ वार्षिकोत्सवको अवसरमा बिफनिफुल प्लेटफर्ममा आबद्ध भई आफ्ना ग्राहकलाई क्रेडिट कार्डबाट किस्ताबन्दीमा सामान खरिद गर्न सक्ने सुविधा सुरु गरेको हो ।
सम्झौताअनुसार नेपाल बैंकको क्रेडिट कार्ड सुविधा प्रयोग गर्ने ग्राहकले ‘Buy Now Pay Later’ सुविधा प्रयोग गरी १८ महिनासम्मको किस्ताबन्दी सुविधामा सामान खरिद गर्न सक्नेछन् । यस सुविधाअन्तर्गत सामान खरिद गर्दा ग्राहकलाई कुनै पनि ब्याज शुल्क लाग्ने छैन ।
नेपाल बैंक लिमिटेडको प्रधान कार्यालय काठमाडौंमा सोमबार कात्तिक १६ गते आयोजित कार्यक्रममा बैंकका तर्फबाट प्रमुख कर्जा अधिकृत प्रदीप कुमार पाठक र फिन्टारा सोलुसन्सका कार्यकारी निर्देशक आशिष कुमार शर्माले सम्झौतामा हस्ताक्षर गरेका छन् ।
नेपाल बैंक लिमिटेड यही कात्तिक ३० गते ९०औँ वर्षमा प्रवेश गर्दैछ । बैंकले डिजिटल प्रविधिको समुचित प्रयोगमार्फत गुणस्तरीय ग्राहक सेवामा जोड दिँदै युवा जनशक्तिमार्फत नेपालमै बैंकिङ सेवा प्रदान गरिरहेको छ ।
यस अवस्थामा युवा जनशक्ति र आधुनिक प्रविधिको समुचित प्रयोगसँगै आम नेपालीमा नेपालको पहिलो बैंक नेपाल बैंकप्रतिको आकर्षण दिनप्रतिदिन बढ्दै गएको बैंकले जनाएको छ ।
