काठमाडौं । सत्तारुढ राष्ट्रिय स्वतन्त्र पार्टी (रास्वपा) का सभापति रवि लामिछानेले सरकारले गर्ने काममा पार्टीले कुनै हस्तक्षेप नगर्ने बताएका छन् ।
बिहीबार चितवनमा सञ्चारकर्मीसँग कुराकानी गर्दै लामिछानेले सरकारले गर्ने काम र पार्टीले गर्ने काम दुवैमा स्पष्टता रहेको भन्दै सरकारले गर्ने काममा पार्टीले कुनै हस्तक्षेप नगर्ने बताए ।
सरकारले गर्ने काम र पार्टीले गर्ने काममा स्पष्टता र सुदृढतामा ध्यान दिइने भन्दै उनले दुवैले गरेका कामकारबाहीमा कहिलेकाहीँ प्रश्न वा जिज्ञासा आएमा बसेर छलफल हुने गरेको र समन्वयको कमी नरहेको उनले बताए ।
सरकार र पार्टीबीच कुनै प्रकारको अन्तरद्वन्द्व नरहेको लामिछानेको भनाइ छ । कुनै पनि संस्थाले गल्ती गरेमा त्यसलाई सच्याउने संस्थाहरू रहेको उनले बताए ।
प्रहरी प्रशासन, अदालत र प्रेस काउन्सिलजस्ता संस्थाहरूलाई विश्वास गर्दै अझ बलियो बनाउनुपर्ने उनको भनाइ छ । परिवक्व ढंगले अघि बढ्नुपर्नेजस्ता प्रश्न आउन नदिने गरी सरकारले विधिको शासनअनुसार चल्न ध्यान दिनुपर्ने उनले बताए ।
