काठमाडौँ, १३ पुस । मोरङको रंगेलीमा ट्याक्टरले ठक्कर दिँदा शुक्रबार एक जना वृद्धको मृत्यु भएको छ।
ट्याक्टरको ठक्करबाट रंगेली नगरपालिका–८ का ६८ वर्षीय नारायण राजवंशीको मृत्यु भएको मोरङ प्रहरीका प्रवक्ता डिएसपी रञ्जनकुमार दाहालले जानकारी दिए।
पूर्वबाट पश्चिमतर्फ गइरहेको ना ६ त ५४९ नम्बरको ट्याक्टरले पैदल हिँडिरहेका राजवंशीलाई रंगेली–८ दर्बेसामा ठक्कर दिएको थियो।
ट्याक्टरले ठक्कर दिँदा राजवंशीको घटनास्थलमै मृत्यु भएको बताउँदै, डिएसपी दाहालले भने, ‘शवलाई पोस्टमार्टमका लागि रंगेली अस्पतालमा राखेर घटनाको अनुसन्धान थालिएको छ।’
घटना लगत्तै ट्याक्टर चालक मोरङको धनपालथान गाउँपालिका–४ का २६ वर्षीय अजय चौधरी फरार छन्। ट्याक्टर र सहचालक रंगेली–२ का ३६ वर्षीय मोहमद अमिरलाई नियन्त्रणमा लिएको छ। फरार भएका ट्याक्टर चालकको खोजी भइरहेको प्रहरीले जनाएको छ।
