काठमाडौं । आफूहरुको विरोध कार्यक्रमका लागि काठमाडौं बाहिरबाट डेढ लाख समर्थक आइसकेको ‘राष्ट,« राष्ट्रियता र धर्म संस्कृति नागरिक बचाउ महाअभियान’ ले दाबी गरेको छ । आज काठमाडौंमा आयोजित पत्रकार सम्मेलनमा अभियानका सहप्रवक्ता राजानन्द माण्डव्यलले डेढ लाख मान्छे काठमाडौं आइसकेको जानकारी दिँदै न्यूनतम ७ लाख मान्छे जम्मा हुने दाबी गरे ।
उनले भने, ‘मंसिर ७ गतेको आन्दोलनका लागि डेढ लाख मान्छे आइसकेको अवस्था छ । भोलि र पर्सिमा थप डेढ लाख आउँछन् । काठमाडौंमा ४–५ लाख मानिस तयारी भएर बसेको अवस्था छ ।’ आन्दोलनमा न्यूनतम ६–७ लाख मान्छे जुट्ने माण्डव्यले बताए ।
त्यस्तै उनले सोही दिन कीर्तिपुर, कलंकी र गोंगबुबाट पनि जुलुसहरू आउने र मध्याह्न १२ बजे बल्खु चोकमा भेला भएर कोणसभा गरिने बताए । कोणसभालाई दुर्गा प्रसाईंलगायतले सम्बोधन गर्नेछन् ।काठमाडौं आएकाहरूलाई आफूहरुले होटल, बैंक्वेट र धर्मशालामा राख्न खोज्दा सुरक्षा निकायले अवरोध गरिरहेको उनको गुनासो छ ।
