काठमाडौं । साताको अन्तिम कारोबारको दिन नेपाल स्टक एक्सचेन्ज (नेप्से) परिसूचक घटेको छ । यसदिन नेप्से परिसूचक ५.४५ अंकले घटेर २ हजार ६ सय ९०.१५ को बिन्दुमा आएको छ । लगानीकर्ताले नाफा बुक गर्दा सेयर बजारमा करेक्सन आएको जानकारहरुको भनाइ छ । यसअघिको पछिल्लो तीन कारोबारको दिन नेप्से परिसूचक बढेको थियो । आज कारोबारमा आएकामध्ये १ सय २ कम्पनीको सेयर मूल्य बढेको छ भने १ सय ६९ कम्पनीको घटेको छ ।
शुक्रबार नेप्से परिसूचक घटेपनि कारोबार रकम भने बढेको छ । आज ८ अर्ब ८९ करोड १५ लाख ९५ हजार रुपैयाँभन्दा धेरैको सेयर कारोबार भएको छ । बिहीबार ८ अर्ब ५७ करोड ९८ हजार रुपैयाँभन्दा धेरैको सेयर किनबेच भएको थियो ।
आज सबैभन्दा धेरै कमाउनेमा बेनी हाइड्रोपावर प्रोजेक्टका लगानीकर्ता रहेका छन् । यस कम्पनीको सेयर मूल्यमा सकारात्मक सर्किट लागेको छ । यता, सबैभन्दा धेरै गुमाउनेमा मेन्छियाम हाइड्रोपावरका लगानीकर्ताहरु रहेका छन् । यसको सेयर मूल्य ४.०८ प्रतिशतले घटेको छ ।
