काठमाडौं । भारतको आन्ध्र प्रदेशमा आएको चक्रवात ‘अर्नब’का कारण पाँच जनाको मृत्यु भएको छ । चक्रवातले घर, खेतीबाली र विद्युत् सेवामा ठूलो क्षति पुर्याएको छ ।
भारत मौसम विज्ञान विभागका अनुसार बुधबार बिहान चक्रवात तटीय क्षेत्रमा प्रवेश गरेको थियो । त्यसपछि यसको तीव्रता घटेको छ । चक्रवातका कारण आन्ध्र प्रदेशको उत्तरी भाग र ओडिसाको दक्षिणी क्षेत्रमा तीव्र हावाहुरी र भारी वर्षा भएको छ ।
चक्रवातबाट प्रभावित ५७ हजार मानिसलाई सुरक्षित स्थानमा सारिएको छ । आन्ध्र प्रदेशका मुख्यमन्त्री एन. चन्द्रबाबू नायुडूले मृतकका परिवारलाई जनही पाँच लाख भारतीय रुपैयाँ राहत दिने घोषणा गरेका छन् । उनले क्षतिको विवरण संकलन गर्न केन्द्रीय टोली पठाउन माग गर्दै भारतका गृहमन्त्री अमित शाहलाई पत्र पनि लेखेका छन् ।
चक्रवातका कारण ७० हजार ९०० हेक्टरभन्दा बढी क्षेत्रफलमा लगाइएको धानबाली र १० हजार ४५० हेक्टर बागवानी बालीमा क्षति पुगेको छ । करिब १८० घर प्रभावित भएका छन् । आन्ध्र प्रदेशको उत्तर र मध्य क्षेत्रमा २५ लाखभन्दा बढी विद्युत् जडानमा सेवा अवरुद्ध भएको छ ।
त्यस्तै, विशाखापट्टनमका ३८ र विजयवाडाका १७ गरी ५५ वटा हवाई उडान रद्द गरिएका छन् ।
चक्रवात कमजोर हुँदै गए पनि ओडिसा, छत्तीसगढ, झारखण्ड र पश्चिम बंगालमा भारी वर्षा हुन सक्ने मौसम विभागले जनाएको छ । तेलंगाना राज्य सरकारले पनि प्रभावित क्षेत्रमा पुनःस्थापनाका काममा सहयोग गर्ने बताएको छ ।
