धनुषा । धनुषाको मिथिला बिहारी नगरपालिकामा श्रीमान्श्री–मती मृत अवस्थामा फेला परेका छन् भने उनीहरूका चार वर्षीय छोरा हतियार प्रहारबाट घाइते भएका छन् ।
मिथिला बिहारी नगरपालिका–३ मथिलेश्वरस्थित माइतीघरमा बस्दै आएकी ३० वर्षीया रिनादेवी यादवको धारिलो हतियार प्रहार गरी हत्या गरिएको आशङ्का गरिएको छ । उनको घाँटीमा धारिलो हतियारको गम्भीर घाउ भेटिएको प्रहरीले जनाएको छ ।
यस्तै, उनका श्रीमान् ३५ वर्षीय उमेश यादव घरभन्दा करिब एक किलोमिटर टाढा रुखमा झुन्डिएको अवस्थामा मृत फेला परेका छन् । वैदेशिक रोजगारीबाट केही दिनअघि मात्रै घर फर्किएका मिथिला बिहारी नगरपालिका–४ भरतपुरका उमेश आइतबार मात्रै ससुराली पुगेका थिए ।
घटनामा मृतक दम्पतीका चार वर्षीय छोरासमेत घाइते अवस्थामा भेटिएका छन् । उनको तिघ्रामा धारिलो हतियार प्रहारको घाउ रहेको र उपचार भइरहेको छ ।
धनुषाका प्रहरी प्रवक्ता डीएसपी ओमप्रकाश खनालले घटनाको प्रकृति अत्यन्तै शंकास्पद रहेको र प्रहरी टोलीले घटनास्थलमा पुगेर सुक्ष्म अनुसन्धान सुरु गरिसकेको जानकारी दिएका छन् ।
