काठमाडौं । यतिबेला सरकारी स्वामित्वसहितका वाणिज्य बैंकहरुले धमाधम लाभांश घोषणा गरिरहेका छन् । अहिलेसम्म १० वाणिज्य बैंकहरुले गत आर्थिक वर्षसम्मको सञ्चित नाफाबाट सेयरधनीलाई लाभांश घोषणा गरेका छन् । लाभांश घोषणा गरेकामध्ये ७ बैंकको बुक क्लोज भइसकेको छ । बुक क्लोज भएका बैंकहरुको सेयर खरिद गर्नेले यो वर्षका लागि लाभांश पाउने छैनन् ।
सरकारी स्वामित्वको राष्ट्रिय वाणिज्य बैंकसहित ९ वटा बैंकले लाभांश घोषणा गर्न बाँकी छ । लाभांश वितरणका लागि घोषणाको तयारीमा उनीहरु रहेका छन् ।अर्थतन्त्र सुस्ताएसँगै विगत वर्षमा नगद र बोनस दुवै लाभांश दिने गरेका बहुमत संख्याका बैंक खुम्चिएका छन् ।
हालसम्म लाभांश घोषणा गरेका १० वटा बैंकमध्ये चार वटाले मात्रै नगद र बोनस दुवै वितरणको घोषणा गरेका छन् । नगद र बोनस दुवै दिने वाणिज्य बैंकको संख्या कम देखिएको छ । ग्लोबल आइएमई र सानिमा, एभरेष्ट र एसबीआई बैंकले मात्र नगद र बोनस दुवै लाभांश दिने घोषणा गरेका छन् ।
एभरेष्ट बैंकले चुक्ता पूँजीको १० प्रतिशत बोनस सेयर र १०.५३ प्रतिशत नगद गरी २०.५३ लाभांश वितरण गरिने बताएको छ ।एसबीआई बैंकले चुक्ता पूँजीको १०.५५ प्रतिशतका दरले लाभांश वितरण गर्ने घोषणा गरेको छ ।सानिमा बैंकले चुक्ता पूँजीको ९ प्रतिशत बोनस सेयर र ५.७ प्रतिशत नगद गरी कुल १४.७० लाभांश वितरण गरिने जनाएको छ । यसैगरी ग्लोबल आइएमई बैंकले हाल कायम चुक्ता पुँजीको ९ प्रतिशत लाभांशमध्ये ८ प्रतिशत नगद लाभांश र १ प्रतिशत बोनस सेयर दिने घोषणा गरेको छ ।
बाँकी ६ बैंकमध्ये नबिल, सिटिजन्स, स्ट्यान्डर्ड चार्टर्ड र सिद्धार्थ बैंकले नगद लाभांश मात्रै वितरण गर्ने घोषणा गरेका छन् । बोनस मात्रै लाभांश वितरण गर्नेमा एनआईसी एसिया र माछापुच्छ्रे बैंक मात्रै छन् ।
