काठमाडौं । एसियाली तथा पश्चिम प्रशान्त क्षेत्रका १८ राष्ट्रका निर्माण व्यवसायीको अन्तर्राष्ट्रिय छाता संस्था इन्टरनेसनल फेडेरेसन अफ एसियन एण्ड वेस्र्टन प्यासिफिक कन्ट्याक्टर्स एशोसिएसन (ईफाप्का) को ४६ औँ अन्तर्राष्ट्रिय सम्मेलन काठमाडौंमा हुने भएको छ । आज पत्रकार सम्मेलन गरी नेपाल निर्माण व्यवसायी महासंघले मंसिर पाँच गतेबाट काठमाडौंमा आयोजना हुने सो सम्मेलनको सम्पूर्ण तयारी पुरा भएको जानकारी दिएको हो ।
ईफाप्का सम्मेलन ‘दिगो पूर्वाधारमा साझेदारी’ भन्ने नाराका साथ मंसिर पाँच गतेदेखि ९ गतेसम्म चार दिनसम्म काठमाडौंको एक होटलमा आयोजना गरिने आयोजकले जनाएको छ । कार्यक्रमको औपचारिक उद्घाटन राष्ट्रपति रामचन्द्र पौडेलद्वारा गरिने महासंघका महासचिव रोशन दाहालले बताए ।
इफाप्कामा १८ वटा देशहरु रहेका छन् । यो नेपालले आयोजना गर्ने दोस्रो सम्मेलन पनि हो । इफाप्कामा १८ वटा देशहरुबाट २५० बढी प्रतिनिधि सम्मेलनमा सहभागी हुन नेपाल आउने इफाप्काका महासचिव एवं नेपाल निर्माण व्यवसायी महासंघका सल्लाहकार समेत रहेका विरेन्द्र दास स्वामीले जानकारी दिए।
