काठमाडौं । भुजुङ हाइड्रोपावर लिमिटेडले पुस ३ गतेदेखि आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीहरूलाई लक्षित गर्दै आईपीओ निष्काशन गर्ने भएको छ ।
कम्पनीलाई जारी पूँजी १ अर्ब रुपैयाँमध्ये २० प्रतिशत अर्थात २० करोड रुपैयाँ बराबरका २० लाख कित्ता साधारण शेयर निष्काशनको अनुमति प्राप्त छ । यसमध्ये १० करोड रुपैयाँ बराबरका १० लाख कित्ता प्रतिशेयर १०० रुपैयाँ दरका शेयर आयोजना प्रभावित स्थानीयहरूका लागि खुला गरिनेछ ।
त्यस्तै, सर्वसाधारणका लागि छुट्याइएको भागको १० प्रतिशत बराबरको १ लाख कित्ता शेयर वैदेशिक रोजगारीमा रहेका, श्रम स्वीकृति प्राप्त नेपालीहरूका लागि खुला गरिनेछ । आईपीओमा न्यूनतम १० कित्ता र अधिकतम ५० हजार कित्तासम्म आवेदन दिन सकिनेछ ।
आयोजना प्रभावित क्षेत्रका स्थानीयका लागि निष्काशन छिटोमा पुस १७ गते र ढिलोमा माघ २ गते बन्द हुनेछ भने वैदेशिक रोजगारीमा रहेका नेपालीका लागि छिटोमा पुस ७ गते र ढिलोमा पुस १७ गतेसम्म आवेदन दिन सकिनेछ ।
