काठमाडौं । युक्रेनको मध्यभागमा रहेको निप्रो सहरको रेलवे स्टेसनमा रुसी ड्रोन आक्रमण हुँदा १४ जनाको मृत्यु भएको छ भने १० जना घाइते भएका छन् ।
यात्रु बोकेको विद्युतीय रेललाई लक्षित गरी आक्रमण भएको सहरका प्रमुख बोरिस फिलातोभले बताएका छन् । जापोरिजिया जान तयारी अवस्थामा रहेको रेलको प्लेटफर्ममा ड्रोन प्रहार भएको थियो ।
युक्रेनी राष्ट्रपति भोलोदिमिर जेलेन्स्कीले घटनालाई भयावह भन्दै रुसमाथि थप कडा प्रतिबन्ध लगाउन अन्तर्राष्ट्रिय समुदायसँग आग्रह गरेका छन् ।
युक्रेनी सरकारी रेल कम्पनीका अनुसार सन् २०२६ को पहिलो आठ महिनामा मात्रै देशको रेल सञ्जालमाथि एक हजार ६०० भन्दा बढी आक्रमण भएका छन् । सन् २०२२ मा युद्ध सुरु भएयता रुसले ५०० भन्दा बढी रेल इन्जिनमा क्षति पुर्याएको वा नष्ट गरेको युक्रेनको दाबी छ ।
