२९ साउन, काठमाडौं । सिके राउत नेतृत्वको जनमत पार्टी पुनः सरकारमा सहभागी हुने भएको छ । जनमत पार्टीबाट मन्त्री सिफारिस भएकी अनितादेवी साहले आज पद तथा गोपनियताको शपथ लिने कार्यक्रम रहेको छ । प्रधानमन्त्री पुष्पकमल दाहाल प्रचण्डले आज जनमत पार्टीलाई सरकारमा सहभागी बनाउनका लागि मन्त्रिपरिषद् हेरफेर गर्न लागेका हुन् ।
हाल २५ सदस्यीय मन्त्रिपरिषद् रहेकोले एक जना मन्त्रीलाई फिर्ता बोलाएर प्रचण्डले जनमतलाई सरकारमा सहभागी बनाउन लागेका हुन् । जनमतलाई सरकारमा सहभागी गराउन माओवादी केन्द्रले संघीय मामिला तथा सामान्य प्रशासनमन्त्री अमनलाल मोदीलाई सरकारबाट फिर्ता बोलाउने निर्णय गरिसकेको छ ।
हिजो बसेको माओवादीको पदाधिकारी बैठकले सामान्य प्रशासन मन्त्री मोदीलाई फिर्ता बोलाउने निर्णय गरे पछि नवनियुक्त मन्त्री साहलाई प्रधानमन्त्री दाहालले सोही मन्त्रालयको जिम्मेवारी दिन लागेका हुन् । मोदीको ठाउँमा अब जनमतकी अनिता देवी साह मन्त्री हुनेछिन् । उनको शपथ आज बिहान १० बजेका लागि तय भएको छ ।
यसअघि पनि जनमत एक मन्त्रीसहित सरकारमा सहभागी भएको थियो । जनमतका अब्दल खान खानेपानीमन्त्री मन्त्री थिए । तर, रोजेको मन्त्रालय नपाएको भन्दै जनमतले उनलाई फिर्ता बोलाएको थियो ।
