काठमाडौँ । पूर्वप्रधानन्यायाधीश चोलेन्द्र शम्शेर जबरा रिहा भएका छन् । पक्राउ पुर्जीबिनै मध्यरातमा घरबाट पक्राउ परेका उनलाई पक्राउ गर्नुको कारण नखुलाई रिहा गरेको हो ।
स्रोतका अनुसार प्रधानमन्त्री बालेन्द्र शाहको सचिवालयको ठाडो निर्देशनमा राणालाई पक्राउ गरिएको थियो । उनलाई अपराध महा शाखाले सामान्य सोधपुछपछि रिहा गरेको हो । उनी के कारणले पक्राउ परेका हुन् भन्ने खुलेको छैन ।
सरकारले पूर्वप्रधानन्यायाधीश जबराको गिरफ्तारीको कानुनी आधार र औचित्यता सार्वजनिक गर्नुपर्छ: कांग्रेस
नेपाली कांग्रेसले पूर्वप्रधानन्यायाधीश चोलेन्द्र शमशेर जबराको गिरफ्तारीबारे सरकारको आधिकारिक धारणा माग गरेको छ । साथै, सरकारले कानुनी आधार र औचित्य सार्वजनिक गर्नुपर्ने कांग्रेसको भनाइ छ ।
पार्टी प्रवक्ता देवराज चालिसेले वक्तव्य जारी गरी नेपाली काग्रेस संवैधानिक सर्वोच्चता, कानूनी शासन, नागरिक अधिकार तथा सबैका लागि कानूनको समान प्रयोगमा विश्वास राख्ने बताएका हुन् ।
‘पूर्व प्रधानन्यायाधीश चोलेन्द्र शमशेरको गिरफ्तारीका सम्बन्धमा सरकारी अधिकारीहरूबाटै परस्पर विरोधी धारणा सार्वजानिक हुनु गम्भीर चिन्ताको विषय हो । गिरफ्तारी कानून सम्मत, आवश्यक र उचित थियो भने सरकारले त्यसको स्पष्ट कानूनी आधार र औचित्य सार्वजानिक गर्न सक्नुपर्छ,’ वक्तव्यमा भनिएको छ ।
कुनै विशेष सुरक्षा चुनौतीबीच अनुसन्धानको आवश्यकता वा अन्य असाधारण परिस्थितिका कारण यस्तो कदम चालिएको हो भने त्यसको विश्वसनीय आधार राज्यले स्पष्ट गर्नुपर्ने कांग्रेसको धारणा छ ।
कांग्रेस अपराधको अनुसन्धान र कानूनको कार्यान्वयनको विपक्षमा नभएको तर कानून कार्यान्वयनको नाममा अस्पष्ट र अन्यौलपूर्ण कानूनी प्रकृया देखिएको अवस्थालाई स्विकार गर्न नसकिने उल्लेख गरेको छ ।
‘कानूनको शासन भनेको राज्यले कानून प्रयोग गर्नु मात्र होइन, राज्यका सबै निकायहरू स्वयं पनि संविधान र कानूनको सिमा भित्र रहनु पर्दछ । यस सम्वन्धमा हामी स्पष्ट छौं,’ प्रवक्ता चालिसे भन्छन्, ‘कसैले कानूनको उलंघन गरेको छ भने निष्पक्ष अनुसन्धान होस, प्रमाणका आधारमा कारबाही होस् र दोषी ठहरिए कानून बमोजिम सजाय होस् । तर गिरफ्तारी स्वयं दोषको प्रमाण हुँदैन ।’
राज्यसँग हुने शक्तिको प्रयोग अझ बढी पारदर्शी, न्यायोचित र जवाफदेही हुनुपर्ने कांग्रेसले जनाएको छ ।
