सुर्खेत : डोल्पाको जुफाल विमानस्थलमा अवतरणका क्रममा सीता एयरको जहाजको पछाडितर्फको दायाँ पाङ्ग्रा खुस्किएको छ। जहाजमा रहेका १३ जना यात्रु भने सकुशल रहेका छन्।
नेपालगन्जबाट जुफालका लागि उडेको जहाज बिहीबार बिहान ८:२५ बजे अवतरण गर्ने क्रममा धावनमार्गमै पाङ्ग्रा खुस्किएको जिल्ला प्रहरी कार्यालय डोल्पाले जनाएको छ।
जिल्ला प्रहरी कार्यालय डोल्पाका प्रहरी नायब उपरीक्षक (डिएसपी) अनिल राज गिरीका अनुसार जहाजमा ७ जना विदेशी र ६ जना नेपाली गरी १३ यात्रु थिए। यात्रुमध्ये ११ जना पुरुष र दुई जना महिला रहेको उनले जानकारी दिए।
जुफाल विमानस्थल प्रमुख मुकुन्द पौडेलका अनुसार अवतरणका क्रममा जहाजको पछाडिको पाङ्ग्रा खुस्किएको हो। जहाज अहिले पनि धावनमार्गमै रहेको र प्राविधिक टोलीले जाँच गरिरहेको उनले बताए।
प्रमुख जिल्ला अधिकारी जुनु हमाल ढकालले जहाजमा सामान्य समस्या देखिएको र सबै यात्रु सुरक्षित रहेको जानकारी दिइन्।
जहाजको प्राविधिक परीक्षण तथा आवश्यक मर्मतका लागि हेलिकोप्टरमार्फत इन्जिनियर ल्याउने तयारी भइरहेको विमानस्थल प्रमुख पौडेलले बताए।
