काठमाडौं । बिहीबार नेपाल स्टक एक्सचेन्ज (नेप्से) परिसूचक बढेको छ । यसदिन नेप्से परिसूचक ८.८१ अंकले बढेर २ हजार ६ सय ५१.२१ को बिन्दुमा आएको छ । आज कारोबारमा आएकामध्ये १ सय ७१ कम्पनीको सेयर मूल्य बढेको छ भने ८६ कम्पनीको घटेको छ ।
आज सबैभन्दा धेरै कमाउनेमा सर्वोत्तम पेन्ट्स र माउन्ट एभरेष्ट पावरका लगानीकर्ताहरु रहेका छन् । यी दुवै कम्पनीको सेयरमा सकारात्मक सर्किट लागेको छ । सर्वोत्तम पेन्ट्सको आइपीओ आज बिहीबार नै नेप्सेमा सूचीकृत भएको हो । यता, आज सबैभन्दा धेरै गुमाउनेमा इमर्जिङ्ग नेपालका लगानीकर्ता रहेका छन् । यो कम्पनीको सेयर मूल्य ५.११ प्रतिशतले घटेको छ ।
बिहीबार नेप्से परिसूचकसँगै कारोबार रकम पनि बढेको छ । आज ३ अर्ब ७२ करोड ४७ लाख ७० हजार रुपैयाँभन्दा धेरैको सेयर कारोबार भएको छ । बुधबार ३ अर्ब ५३ करोड २१ लाख ५ हजार रुपैयाँभन्दा धेरैको सेयर किनबेच भएको थियो ।
